“ကျနော် စိတ်ကို ထိန်းမထားနိုင်တော့တာပါ။ တတိယမြောက်ဂိုး ဝင်သွားတဲ့အချိန်မှာ ကျနော့်ရင်ထဲမှာ တစ်ခုခု ကျိုးပဲ့သွားခဲ့တယ်။ ပွဲပြီးခါနီး ဝီစီမှုတ်လိုက်တော့ ကွင်းထဲကို ကြည့်ပြီး မန်ချက်စတာယူနိုက်တက် ဒီလောက်ထိ ကျဆင်းသွားရတာလဲဆိုတာ ကျနော် စဉ်းစားလို့ကို မရတော့ဘူး။
ကျနော်က နည်းပြဖြစ်တဲ့အတွက် တာဝန်ယူရမှာပါ။
ပရိသတ်တွေ အနေနဲ့ သိထားစေချင်တာက ဒီကလပ်ဟာ ကျနော့်အတွက် အလုပ်တစ်ခုထက် ပိုပါတယ်။ ကျနော် မန်ယူမှာ ကစားခဲ့ဖူးတယ်၊ ဖလားတွေ ယူခဲ့ဖူးတယ်၊ ဒီကလပ်က ဘယ်လို အဆင့်အတန်းမျိုး ဖြစ်ရမလဲဆိုတာ ကျနော် ကောင်းကောင်းသိပါတယ်။ အိုးထရက်ဖို့ဒ်မှာ ၃-၀ နဲ့ ရှုံးတာကို ကြည့်နေရတာ၊ ပရိသတ်တွေ စိတ်ပျက်လက်ပျက် ထွက်သွားကြတာကို မြင်ရတာ တကယ့်ကို ရင်ကျိုးစရာပါ။
ကျနော် ပရိသတ်တွေကို ကြည့်မိတော့ သူတို့ရဲ့ မျက်နှာတွေကိုတောင် ကြာကြာမကြည့်ရဲခဲ့ဘူး။ ကျနော် သူတို့ကို ဘာသွားပြောရမှာလဲ။ ကျနော်တို့ ကြိုးစားခဲ့ပါတယ် လို့လား၊ နောက်တစ်ကြိမ်ကျ ရအောင်လုပ်ပါမယ် လို့လား။ ဒီစကားတွေကို သူတို့ ကြားရလွန်းလို့ ငြီးငွေ့နေကြပြီ။ အမှန်အတိုင်း ပြောရရင် ကျနော် ကြောက်နေပြီ။
ကျနော်တို့ အခု ကစားနေတဲ့ ပုံစံအတိုင်းဆိုရင် မန်ချက်စတာယူနိုက်တက်ဟာ ဒီရာသီမှာ တန်းဆင်းသွားရလောက်တဲ့အထိ ဖြစ်နိုင်ပါတယ်။ ဒီကလပ်နဲ့ ပတ်သက်လို့ ဒီလိုစကားမျိုး ကျနော့်ပါးစပ်က ပြောရလိမ့်မယ်လို့ မထင်ခဲ့ဖူးပေမဲ့ မြင်နေရတာတွေကို မသိကျိုးကျွံ ပြုလို့မှ မရတာ။ ကျနော်တို့ အမှားတွေကို ခပ်ထပ်ထပ် လုပ်နေကြတယ်၊ ရုန်းကန်နေရတယ်၊ ဘာမှလည်း ပြောင်းလဲမလာဘူး။
လူတွေက ကျနော့်ကို ထုတ်ပစ်သင့်ပြီလို့ ပြောကြလိမ့်မယ်၊ သူတို့ရဲ့ ဒေါသကိုလည်း ကျနော် နားလည်ပါတယ်။ သူတို့ ပိုက်ဆံကုန်ခံတယ်၊ ဘာပဲဖြစ်ဖြစ် ဒီကလပ်ကို အမြဲ အားပေးကြတယ်၊ အခု ကျနော်တို့ ပေးနေတာထက် ပိုကောင်းတာနဲ့ပဲ ထိုက်တန်ကြပါတယ်။ ဒါပေမဲ့ ကျနော့်ကို အနာကျင်ရဆုံးကတော့ မန်ချက်စတာယူနိုက်တက်ဟာ ကျနော့်မျက်စိရှေ့မှာတင် ပျက်စီးနေပြီး ကျနော်ကိုယ်တိုင်က အဲဒါကို တားဆီးပေးရမယ့်သူ ဖြစ်နေတာပါပဲ။
ကျနော် ငိုခဲ့တာ ဘောလုံးပွဲ တစ်ပွဲ ရှုံးလို့ မဟုတ်ပါဘူး။ ဒီရာသီ ဘာတွေ ဆက်ဖြစ်လာမလဲဆိုတာကို ကြောက်လာမိလို့ ငိုခဲ့တာပါ။ မန်ချက်စတာယူနိုက်တက် တန်းဆင်းသွားတာကို ထိုင်ကြည့်နေရတဲ့ နည်းပြတော့ ကျနော် မဖြစ်ချင်ဘူး။ အဲဒီဒဏ်ကို ကျနော် ဘယ်လိုမှ တောင့်ခံနိုင်မှာ မဟုတ်ပါဘူး။”