မာတင် အော်ဒီဂတ်ရဲ့ ဒုတိယပိုင်း လှပတဲ့ အဆုံးသတ်ဂိုးနဲ့အတူ အာဆင်နယ်အသင်းဟာ နာပိုလီအသင်းကို အဝေးကွင်းမှာ ၁-၀ ဂိုးနဲ့ အနိုင်ရရှိပြီး ချန်ပီယံလိဂ်ပြိုင်ပွဲကို အနိုင်ရလဒ်နဲ့ စတင်နိုင်ခဲ့ပါတယ်။
ပြီးခဲ့တဲ့ ရာသီ ဗိုလ်လုပွဲမှာ ပီအက်စ်ဂျီအသင်းကို ပင်နယ်တီနဲ့ ရှုံးနိမ့်ခဲ့ပြီးနောက်ပိုင်း ပထမဆုံး ဥရောပပြိုင်ပွဲ ပြန်လည်ယှဉ်ပြိုင်ခဲ့တဲ့ မီခေး အာတီတာရဲ့ အာဆင်နယ်အသင်းဟာ ဗုဒ္ဓဟူးနေ့က စတာဒီယို ဒီယေဂို အာမန်ဒို မာရာဒိုးနား ကွင်းအတွင်း ပွဲချိန်တစ်လျှောက်လုံး အပြတ်အသတ် အသာစီးရယူ ကစားသွားခဲ့တာပါ။
ပထမပိုင်းမှာ ဘူကာယို ဆာကာနဲ့ မယ်ရီနိုတို့ အကောင်းဆုံး အခွင့်အရေးအချို့ လွဲချော်ခဲ့ပေမဲ့ ပွဲချိန် ၁၅ မိနစ်အလိုမှာတော့ လက်ရှိ ခြေစွမ်းပြနေတဲ့ အသင်းခေါင်းဆောင် အော်ဒီဂတ်က အနိုင်ဂိုးကို ပြင်းထန်စွာ ကန်သွင်းယူပေးခဲ့ပါတယ်။
ပွဲစချိန်ကတည်းက အာဆင်နယ်တို့ အစွမ်းပြခဲ့ပြီး ဗစ်တာ ယောကရက်စ်ရဲ့ ဖြတ်တင်ဘောကတစ်ဆင့် ဆာကာက နောက်ပြန် ကန်သွင်းခဲ့ရာ ဂိုးသမား အဲလက်စ် မဲရက် ကာကွယ်သွားခဲ့ပါတယ်။
အခြားတစ်ဖက်မှာတော့ ကီဗင် ဒီဘရိုင်းနားရဲ့ အဝေးကန်ချက်ကို အာဆင်နယ်ဂိုးသမား ဒေးဗစ် ရာယာ ပုတ်ထုတ်ခဲ့ရပါတယ်။
အဲဒီနောက် ဆာကာရဲ့ ပေးပို့မှုကတစ်ဆင့် အီဘရယ်ချီ အက်ဇေးခေါင်းတိုက်ဖန်တီးပေးခဲ့တာကို မယ်ရီနို က အနီးကပ် ခေါင်းတိုက်ခဲ့ပေမဲ့ မဲရက် က အံ့ဩဖွယ် လက်စွမ်းပြ ပုတ်ထုတ်နိုင်ခဲ့လို့ နာပိုလီတို့ ကံကောင်းစွာနဲ့ ဂိုးမပေးခဲ့ရပါဘူး။
အာဆင်နယ်တို့ ပိုမိုဖိအားပေးလာချိန်မှာ အက်ဇေးရဲ့ ကန်ချက် ဘေးထွက်သွားခဲ့သလို ဘယ်နောက်ခံလူ ပီယာရို ဟင်ကာပီရဲ့ ဖြတ်တင်ဘောကလည်း မဲရက်ကို အတော်လေး ခြိမ်းခြောက်နိုင်ခဲ့ပါတယ်။
အော်ဒီဂတ်က ဆာကာထံ အကွက်မြင်မြင် ထိုးပေးခဲ့ပေမဲ့ ဆာကာ က အပေါ်ထောင်ကန်လိုက်တာကြောင့် ပထမပိုင်းရဲ့ အကောင်းဆုံး အခွင့်အရေး လွဲချော်ခဲ့ရပါတယ်။
ဒုတိယပိုင်းမှာလည်း အာဆင်နယ်တို့ ဆက်လက်ဖိအားပေးခဲ့ပြီး အော်ဒီဂတ်ရဲ့ မတင်ပေးမှုကတစ်ဆင့် ဘင် ဝှိုက် ခေါင်းတိုက်ဆင်ပေးခဲ့တာကို ဟင်ကာပီ က ဂိုးဧရိယာအတွင်း ပိတ်သွင်းခဲ့ပေမဲ့ အပေါ်ကျော်ထွက်သွားခဲ့ပါတယ်။
ဒါပေမဲ့ ပွဲချိန် ၇၅ မိနစ်မှာတော့ လူစားဝင်လာတဲ့ ခရစ်စတော့ ဇိုလစ်နဲ့ အော်ဒီဂတ်တို့ အပြန်အလှန် ပေးပို့ကစားအပြီးမှာ အော်ဒီဂတ်က ပင်နယ်တီ ဧိရိယာအစွန်ကနေ ဘယ်ခြေနဲ့ အပြင်းကန်သွင်းခဲ့တဲ့ဘောလုံးက ဂိုးတိုင်ကို ထိပြီး ဂိုးအတွင်းဝင်ရောက်သွားခဲ့လို့ အာဆင်နယ်တို့ ဦးဆောင်ဂိုး ရရှိခဲ့ပါတယ်။
ပွဲချိန် ၅ မိနစ်အလိုမှာ နိုနီ မာဒူအေကေ က အာဆင်နယ်အတွက် အနိုင်ဂိုးကို သေချာအောင် သွင်းယူနိုင်ခဲ့သင့်ပေမဲ့လည်း လူစားဝင်ဂိုးသမား ဗန်ဂျာ မီလင်ကိုဗစ်-ဆားဗစ် က ကာကွယ်သွားခဲ့ပြီး ဇိုလစ်ရဲ့ ထပ်မံကန်သွင်းချက်ကိုလည်း နာပိုလီခံစစ်က ဂိုးစည်းပေါ်ကနေ တားဆီးသွားခဲ့ပါတယ်။
အဲဒီနောက် မီလင်ကိုဗစ်-ဆားဗစ် ပုတ်ထုတ်လိုက်တဲ့ ဘောလုံးကို ကိုင် ဟာဗတ်ဇ် က ပိတ်သွင်းယူခဲ့ပေမဲ့ လူကျွံနေခဲ့ပါတယ်။
ဒါပေမဲ့လည်း အာဆင်နယ်တို့ ပွဲပြီးတဲ့အထိ ထိန်းကစားနိုင်ခဲ့လို့ နေပယ်မှာ အရေးပါတဲ့ အဝေးကွင်း နိုင်ပွဲကို အရယူသွားနိုင်ခဲ့ပါတယ်။